John 18

Laghe kunela Iesu

(Mat 26:47-56; Mak 14:43-50; Luk 22:47-53)

1Nau eteva Iesu ghe ruula tani looloo sae, ia me kapuna disaepolo atoa laghe laula tale ateo arighi eKidron, me laghe lao sio tale paa ngutana atingiu.

2Jiudas, ia o taumattu ngateva aue taula Iesu ta tau ngai ssateena atoa, ghe kilakila nongina Iesu ghe lao sio, poli oroi nau ia me kapuna disaepolo atoa laghe laolao etana. 3Jiudas ghe lao sio tale paa ngutana atingiu tee soldia ngatoa me polisi etoa, namuu ta pristi etoa me Paresi etoa laghe sungilala. Laghe sausau lam me usulu me voto aiaaiuvi.

4Iesu ange kila akapala voto aue lutu tale maamauluaane. Liuna avalua o me ghe tingina ghoala etaira me ghe uela etaira va, “Am paepae see?”

5Laghe liula me laghe uela va, “Ami paepae Iesu aNasareti ia.”

Me Iesu ghe uela va, “Aghi oia.” Jiudas, ia o ghe tau lao sio Iesu, ghe tiitingina teeila. 6Nau eteva ghe ruula tani ue va, “Aghi oia,” me laghe kaakatungaala viliira etapaa kosa.

7Me Iesu ghe mene kolomilala va, “Am paepae see?”

Me laghe uela va, “Iesu aNasareti ia.”

8Iesu ghe liula me ghe uela etaira va, “Ngaghauliaala etaimim va aghi oia. Arova am paepaeaghi, am tau velu lo atoa toko, me la kasu.” 9Isaa o voto ghe lutula me inangari ghe aulia ngakasina alokoila ghe koronnala va, “Karika teva ughe tau mae sio etaghi ghe rauela.”

10Saemon Pita ghe sausau iema ateva. Ghe kapeala, me ghe patoala kapuna tau ngai nongonongo anna ateva Namu ngateva tana Pristi, me ghe patoa vella talingane ativilau tale pai muenna atelange. Ararina ateae ia o tau ngai nongonongo anna ateva ta Malkus.

11Me Iesu ghe uela ta Pita va, “Kaaila iema ateva tale aikakkaaina ateva. Uannaa va karika arooroo tani ropi kapa ateva Tamaghi ghe taue mae sio?”

Laghe laoa asio Iesu ta Annas

(Mat 26:57-58; Mak 14:53-54; Luk 22:54)

12Me kapuira namu ngateva soldia me kapuna soldia ngatoa me polisi etoa me kapuira namu ngatoa aJiu etoa laghe kunela Iesu, me laghe irila nimana. 13Me laghe laoa ngakasinaie sio mua ta Annas. Annas alumuna ta Kaeapas, Kaeapas Namuu ia ta Pristi etoa tale ia o ninamanama ateae. 14Kaeapas ia o taumattu ngateva ghe uela ta aJiu etoa va emaamasina arova kateva nonga taumattu ghele mate tani ghaa liuira akapa taumattu ngatoa.

Aitiutiu ta Pita tani ue va etam kilakila Iesu

(Mat 26:69-70; Mak 14:66-68; Luk 22:55-57)

15Saemon Pita me mene kateva disaepolo lalu ghe aimuli tee Iesu. Poli Namu ngateva tana Pristi ekilakila ia o disaepolo ateva, liuna avalua o me ia o disaepolo ateva ghe sso teela Iesu elome tale unna valavala ateae ia o Namu ngateva tana Pristi. 16Me Pita nonga ghe toitoi eleka tale atamana ateae. Ia o disaepolo ateva, Namu ngateva tana Pristi ghe kilakilaia, ghe oghi ghoala, me ghe aippoa teela aliki vause ateva ghe aaitoia atamana ateae, me ghe kolola Pita, me lalu ghe kupi ssola.

17Me aliki vause ateva ghe aaitoia atamana ateae ghe uela ta Pita va, “Io tee kateva kapuna disaepolo ia okae taumattu ngateva, va?”

Pita ghe liula me ghe uela va, “Karika va aghi tee.”

18Poli kkaili eteva me tau ngai nongonongo anna atoa me polisi etoa laghe aisokosokolaala kura ateae, me laghe maamaruu. Pita tee ghe tiitingina teeila tani maruu.

Namu ngateva tana Pristi ghe kolomila Iesu tale nikokkolomi

(Mat 26:59-66; Mak 14:55-64; Luk 22:66-71)

19Namu ngateva tana Pristi ghe kolomila Iesu ta kapuna disaepolo atoa me tale voto ghe aapasunga.

20Iesu ghe liula me ghe uela va, “Aghe aapasunga voto ta mata ngoroi etoa. Aghe aapasunga tale ale nivelu eitaua me tale ale manga, isaa o voto aJiu etoa laghe mae veluvelu eitaua etana. Karika aghe aulianga eisulia righi voto. 21Vaalua me ukookolomieghi? Ukolomi lo atoa laghe nongonongoaghi, poli ila la kilakila sa ateva aghe aaulieinia.”

22Nau ta Iesu ghe aulia ngavaluela o, me kateva polisi ghe tiitingina akalakala etana ghe posalaiela me ghe uela va, “Vaalua me uliuliu ase inangari eteva o ta Namu ngateva tana Pristi?”

23Iesu ghe liula me ghe uela va, “Arova aghauliaala righi voto sesa, uauliaa ngaotu, me arova aghauliaa voto koronna, vaalua me uposalaieghila?” 24Me Annas ghe sungiela va elao ta Kaeapas, ia Namuu ia ta Pristi etoa. Iriiri ia me laghe laoainie sio.

Pita ghe mene uela va karika ekilakila Iesu

(Mat 26:71-75; Mak 14:69-72; Luk 22:58-62)

25Saemon Pita ghe tingina maamaruu me laghe kolomiela va, “Io tee kateva kapuna disaepolo, va?”

Ghe liula me ghe uela va, “Karika va aghi tee.”

26Kateva kapuna tau ngai nongonongo anna Namu ngateva ta Pristi etoa, kapuna ia ia o taumattu ngateva Pita ghe sai vella talingane atelange, ghe uela va, “Aghe tara teeiola tapaa ngutana nau eteva am meia, va?” 27Me Pita ghe mene uela va, “Karika.” Me paolo ateva taita ia ghe aangarila.

Laghe laoa asio Iesu ta Paelat

(Mat 27:1-2, 11-14; Mak 15:1-5; Luk 23:1-5)

28Vara me aJiu etoa laghe ghaala Iesu ta Kaeapas, me laghe laoainie sio tanganuena Gavana ngateva. Elue talaua poppoaa. Laghe tam aloanna tani kupi sso tanganuena, poli laghe rau gheleila va laghe tam raarangisana, poli laghe aloanna va la usi tani namanama ta Pasova ngateae. 29Paelat ghe kupi ghoa mae me ghe uela va, “Vaalua me am maea asio taumattu ngateva oia va eaisakei?”

30Me laghe uela va, “Arova karika ghe gheelei righi sesa voto, karika aue ami ghele maeainia etam.”

31Me Paelat ghe uela etaira va, “Am ghaaiela, me am laa ghelei niaisakei etana nongina uneimim lo eaaulia.”

Me aJiu etoa laghe liula me laghe uela va, “Karika erooroo va ami, ami uvi emate teva taumattu.” 32Isaa o voto ghe lutula me inangarina Iesu ghe aaimatoonga ase nimate ateae aue eghaaia ghe lutu ekoronnala.

33Paelat ghe mene kupi ssola tale ale ateva me ghe uela va la kolo mae Iesu, me ghe kolomila Iesu va, “Io kapuira kingi io aJiu etoa?”

34Me Iesu ghe kolomiela va, “Nannaam llo ona, o toa laghe aulia tau aatu sio etam?”

35Paelat ghe liula me ghe uela va, “Vara aJiu eghi? Kapum atoa me namu ta pristi etoa la maeainio sio etaghi. Sa ateva ughe gheleiela?”

36Iesu ghe uela va, “Ararimangalighi eteva karika va pei tale kosa ateva oia. Arova pei tale kosa ia, aue kapughu tau ngai nongonongo anna atoa laghele aiuuvi tani ghelei runga aJiu etoa, me karika aue laghele kuneieghi. Me ia oia, ararimangalighi eteva karika pei tale kosa ateva ia.”

37Paelat ghe uela va, “O io kingi io, va?”

Me Iesu ghe uela va, “Uaulia ngakoronna tani ue va aghi kingi eghi, poli mausina avalua o me aghe lutula, me aghe sio mae tale kosa ateva tani aulia ngaotu voto koronna. Lo atoa tale pai koronna ativilau, la nongonongo usilainaghi.”

38Paelat ghe kolomiela va, “Saa ia koronna ateva voto?”

Ghe aulia ngavaluela o me ghe ghoala eleka nongina aJiu etoa, me ghe uela va, “Karika ngapaela righi voto esuisui kkai va sesa voto ghe ghelei. 39Kateva ase voto agheeleia nau Pasova, atautau velu kateva taumattu etokatoka tale ale mata voovoo ekupikupi ghoa. Am aloanna va atau velu kapuimim kingi eteva aJiu etoa?”

40Laghe ovaova anamuu tani liu va, “Karika mene ia! Utau velu Barabas!” Barabas tau niaiuvi ia.